إكسبريس تيفي/
ملف الناصيري لي خرج منو هاذ العجب كامل ملف متسخ، يخلي أي مغربية أو مغربي يخاف على جنابو و يشك في كلشي…
الغبرة و الحشيش جزء صغير من الملف، و لكن بفلوسهم باش هاذ الناس صنعوا نفوذ و بانوا فيسات جداد و تعداو على الناس!
شحال ديال الشباب ضاعوا بسباب الغبرة و شحال ديال الاسر تشتات، و كلشي عارف هاذ السنوات الاخيرة اش دارت البوفة في المجتمع.. و هذا كان الوجه لي بان ديال هاذ الجرائم، في حين أن المخبي ، كان أوقح و أخطر و كيبين لينا كاملين أن الاجرام عقلية.. و طريق كايعرف مولاها فين كتبدا و لكن ما كيعرفهاش فين غادي توصلو!!
هاذ الناس لي كانوا صحة سلامً خدامين في الغبرة و الحشيش و السياسة داروا الفلوس، كانوا كيديروا سواريات ملاح، و كيعرضوا على أصدقاءهم من النافذين، في السياسة و الرياضة و الصحافة و علم الله اش اخر .. و كيصوروا اللحظات الحميمية باش يشدوا عليهم فيديوهات يضغطوا بيهم نهار يحتاجوهم!!
تحت شعار لي طاح في المقلة يتقلى! هاذ الناس ولاو كيحكموا نعاماسي، الا ما درتيش لي بغاو بالخاطر كديرو بزز منك لانهم شدوا عليك فيديو و ساهلة يشوهوك!
الحاصول دارو ما بغاو و طغاو!!!! و لكن الظلم الظلمات و ربي كبير!!!
ظلموا واحد المرأة و فبركوا ليها ملف باش يصيفطوها للحبس و كان هاذ الملف المفبرك هو سباب فضيحتهم و عذابهم….
هاذ المرأة هي زوجة البعيوي، لي عندو معاها تلاثة ديال الوليدات، بغا يتفك منها و يحرمها من حضانة ولادها و حقوقها و عشيرو الناصيري عطاه الفتوى!!!!
الخيانة الزوجية، تهمة ساهلة، و كاين صحاب الحسنات، 30 مليون و يدوز معاها حبيبيس و هانتا تفكيتي منها و شوهتيها !!
و داكشي ماكان، البعيوي بات مع مراتو فالدار صحة سلام، و قالها عندو موعد و خرج بكري…
الكاري حنكو لي غادي يمثل دور العشيق كان حدا الباب، بعيوي خرج و حل ليه الباب ديال الفيلا و دخلو…. وًما هي الا دقائق حتى دخلوا البوليس و لقاؤه عريان وسط الدار و هزوه هو و المرأة لي ما كانتش شافتوا اساسا!!!! ظلم و قهرة ! تخيلوا هاذ السيدة مسكينة لي راجلها بايت حداها و مخطط يصيفطها للحبس …
و لكن ربي كاين، وواحد الجار عندو كاميرا مشى دار ليها التفريغ و لقى البعيوي خرج و رجع دخل الراجل للدار و البوليس كانو بكري في الزنقة !! يعني تهمة مفصلة مخيطة.. هاذ الجار عيط للاخ ديال الزوجة المغدورة و عطاه التسجيل… و طبعا، الزوجة حفظها الله و لكن الناصيري و البعيوي فاصلوها و طفاو الملف..
هاذ الزوجة المغدورة هي لي كان ليها الفضل باش فركعات هاذ القضية، و مشات عند الشرطة و عطاتهم الوثائق لي استولى بيهم بعيوي على املاك المالي!!! و طبعا الملف يالاه بدا و باين أنها شبكة ديال الحوت مطلوقة و باقية كطلع في الاسماك!
هاذ الملف بحال ملف المصور الذي بلغ عن جريمة استغلال فتيات جنسيا من طرف واحد الصحفي و اصدقاء ديالو مقابل التدخل في ملفات قضائية، و باش يسكتوا الصحفي، فبركوا ليه واحد الملف و جابوا واحد كاري حنكو دار بيه شكاية و هبطوه بالزربة …. و الاخطر دار شكاية بأن دوك الفتيات هوما لي استدرجوا الصحفي…
طبعا، كلشي باقي أمام القضاء و لكن المهم هي أن المسؤولين ديال هاذ البلاد يعرفو أنه راه ما كاينش غير ايسكوبار الصحراء، كاين ايسكوبارات اخرين لا زالوا يتجولون و يفبركون ملفات…. و ما حدهم باقين ما تحاسبوش، راه شلا مواطنين في خطر!!!!
