نجيبة جلال تتساءل .. علاش البنية السرية تحارب سياسة إعادة الادماج التي اختارتها الدولة ؟

إكسبريس تيفي

اكسبريس تيفي 

يبدوا أن الوقع ديال حلقات برنامج “شن طن”، كان قوي بزاف على اعضاء البنية السرية، خصوصا وأن الزميلة نجيبة جلال مديرة نشر جريدة اكسبريس تيفي قدرت بأسلوبها التحليلي المشوق تكشف للرأي العام الخطط الخبيثة ديال هذ البنية، وكذلك الاهداف ديالها وطرق استقطابها للعملاء، وأيضا قدرات تكشف أجهزتها وطريقة اشتغالها عن طريق الابواق المأجورة ديالها، سواء من داخل الجسم الاعلامي أو عبر بعض صعاليك السوشل ميديا اللي كتسميهم نجيبة إما أذناب الخونة أو الذئاب المنفردة.

والجديد هذ المرة هو أن نجيبة جلال بينت للرأي العام خلال حلقة أمس من برنامجها “شن طن“، أن الغباء ديال أبواق هذ البنية لا حدود له، فبعدما هاجموها بالتشهير وفي العرض ديالها، فبلا ما يشعروا كشفوا على تضايقهم من الطريقة اللي كتحتضن بها المملكة المغربية أبنائها اللي سبق ليهم كانوا مورطين في ملفات سياسية وقضايا جرمية، وايضا من كيفية ادماجهم داخل المجتمع، تحت شعار “إن الوطن غفور رحيم”، لأن العفو في المنطق الديني يتربع على هرم الاخلاق الفاضلة، وفي المنظور الحقوقي الاستثمار في إعادة ادماج الخارجين عن القانون كيبقى من أنجع وسائل محاربة الجريمة.

وأوضحت مديرة نشر اكسبريس تيفي، أن البنية السرية ماشي من مصلحتها المغرب يتصالح مع ابنائه، والدليل هو الحملة المسعورة اللي كان ضحيتها عبد الوهاب رفيقي الملقب ب “أبو حفص”، اللي كان متابع في قضايا الارهاب سابقا، واليوم بعد المصالحة والادماج ديالوا في المجتمع قدر يكمل الدراسة ديالوا في الجامعة واحصل على الدكتوراه في القانون، ونجح في مباراة المنتدبين القضائيين، الامر اللي خلى اذناب البنية السرية كيهاجموه وينشروا معلومات مغلوطة حول التحاقه بالوظيفة العمومية في قطاع العدل، واستعرضت نجيبة جلال مجموعة ديال الحالات المشابهة اللي سلكات نفس التوجه.

وفي نفس السياق، قالت نجيبة جلال أن سياسة الوطن غفور رحيم شملات شخصيات بارزة في قيادات جبهة البوليساريو ومنهم مؤسسين للجبهة وقياديين عسكرين، مثل البشير الدخيل، وابراهيم الحكيم، وكجمولة بنت أبي، والحبيب أيوب، معلقة على الامر ب”أنهم مغاربة أخطأوا في حق الوطن وعفى عنهم الوطن”، واعتبرت نجيبة ان نجاح المغرب في احتضان ابنائه والعفو عنهم كيشدد الخناق على البنية السرية لأنها ما غاداش تلقى باش تخدم مستقبلا، وتكلمت نجيبة على الحملة المسعورة اللي كيتعرضوا ليها الاشخاص اللي سبق للبنية السرية وظفاتهم في خططها وبعدما عرفوا الحقيقة ديال العصابة انقلبوا عليها ورجعوا لاحضان الوطن.

وقالت نجيبة أن من بين الشباب اللي تعرضوا لحملة تشهير كبيرة، الشاب المعروف ب نور زينو، اللي بعدما عرف حقيقتهم اعتذر للمغاربة، وادلى ببعض التصريحات فضحات بعض اعضاء الشبكة وكيفاش خدموا به واستعملوه باش يضربوا في المملكة وفي المسؤولين الساميين في الدولة، وبعدما خرج من يديهم تعرض للتشهير وتأجيج الرأي العام ضده، وتهديدات بالقتل لأنه “مثلي”، وعرضت نجيبة خلال الحلقة مقطع لليوتبر الشهير تحفة، كيفضح من خلالوا الطريقة اللي حاول المحامي محمد زيان يستقطبوا بها والاغراءات الكبيرة اللي كيشتغلوا بها اعضاء هذ الشبكة خصوصا كيفاش وهيبة خرشيش خلصات عليه هو والطاقم ديالوا تذاكر الطائرة الباهضة، والاقامة في فندق فخم، وكشف ايضا بطريقته الساخرة كيفاش تواصل معه زكريا المومني ومحمد حجيب وايضا استهدافهم لعبد اللطيف الحموشي.

وفي نهاية الحلقة، بينت نجيبة جلال لمتتبعيها كيفاش أن سياسة الادماج والمصالحة اللي كتنهجها الدولة كتشكل تهديد حقيقي للبنية السرية، لأن هذ السياسة حولات أبو حفص من متهم في جرائم الارهاب، الى وجه بارز في التصدي للفكر الظلامي ومحاربة التشدد، وقدرات ايضا سياسة المصالحة تحول كل من تحفة والشاب نور زينو الى اشخاص يحاربون عصابة البنية السرية، ويكشفون خططها للرأي العام عبر مواقع التواصل الاجتماعي، وبينت أيضا كيفاش البنية السرية من اجل بلوغ الاهداف ديالها القذرة كتقدر تغامر بالأذناب ديالها كيفما وقع مع ادريس فرحان اللي كان متابع في ملف الهجرة السرية بالمغرب فاستغلاتوا البنية السرية وجعلوا منه بوق يمرر خطاباتهم الامر اللي خلاه يتورط في ملف ابتزاز خطير للفنانة لطيفة رأفت، اللي كان الهدف منه الضرب في مستشار ملكي ومدير الأمن الوطني.