إكسبريس تيفي/عبدالرحمان افريجي:
عرفت القضية ديال المنشط الإذاعي محمد بوصفيحة المعروف ب “مومو” مستجدات مهمة يوم أمس، بعدما استمعت المحكمة الابتدائية الزجرية بعين السبع بالدار البيضاء للمتهمين بتهمة اختلاق سرقة وهمية تم نشرها على أثير الإذاعة في برنامج ترفيهي.
المتهمين في القضية ثلاثة ديال الأشخاص، الأول خدام في وكالة لكراء السيارات، والثاني خدام سائق ديال سيارة إسعاف، بالإضافة إلى المنشط الاعلامي الشهير محمد بوصفيحة.
بعد افتتاح الجلسة تم الاستماع للمتهم الثاني اللِّي عطاتو هيئة المحكمة الفرصة يحكي تفاصيل الواقعة، وقال أن المتهم الأول اتصل به وقال ليه بالحرف “راني اتصلت بهيت راديو وشاركت في مسابقة وراها مضمونة” وفي الغد مشاو لمقر الإذاعة المذكورة في الرباط هو والمتهم الأول، غادي يدخل المتهم الثاني بوحدو والمتهم الأول بقى في الخارج في الانتظار، واستقبلاتو السيدة المكلفة باستقبال المكالمات وغادي يدخل عند مومو وعطاه هاتف ايفون 15 كيفما شفنا جميع في مقطع الفيديو المتداول، ولكن المفاجأة هي القاضي طرح سؤال على نفس المتهم، “كيفاش انت مستخدم اسم زائف ودخلتي لمقر الإذاعة بالبطاقة الوطنية ؟ هنا تردد المتهم وجاوب القاضي، بأنه دخل بعدما اتصل بالسيدة المكلفة باستقبال المكالمات بنفس الرقم لي اتصل به على الاثير مباشرة، هنا القاضي كيبتسم وكيسولوا من جديد، “بعدما خذيتوا الهاتف اشنو درتو به ؟” غادي يجاوبو المتهم قائلا “بعناه بسبع الآلاف درهم وخذيت منها الفين وثماني مائة درهم، هنا القاضي سولوا علاش خذيتي غير هذ المبلغ ؟ كان جواب المتهم مضحك بعدما قال ليه أن المتهم الأول خبرني بلي غادي نشريو قفف ونتبرعو ا بهم للأسر المعوزة.
استمعت هيئة المحكمة ايضا للمتهم الأول لي نعتوا القاضي ب “القافز، وحكى تفاصيل الواقعة اللي راجت في مقطع الفيديو، واعترف بلي هو لي خطط للعملية، وسولوا القاضي: شحال من مرة ربحتي في المسابقات ديال هيت راديو ؟ المتهم قال بأنه اول مرة غادي يشارك، هنا القاضي غادي يحاصروا وجبد ليه الأدلة بعد افراغ سجل المكالمات لي سبق ليه جراها مع الإذاعة وبانه كان كيشارك في المسابقات من 2018، وسبق ليه فاز بالفين درهم وسبق ليه شارك باسم مستعار “نوفل”، في هذ اللحظة المتهم تصدم واعترف بأنه فعلا كان كيشارك في المسابقات وكيفوز، وغادي يسولوا القاضي “واش كتعرف مومو شخصيا ؟ المتهم نفى المعرفة ديالو الشخصية بالمنشط الإذاعي المذكور.
ومباشرة بعد الاستماع للمتهمين، جاء الدور على محمد بوصفيحة، لي نفى علاقتوا بالمتهمين، وقال أنا شخصية معروفة وصاحب هذاك الرقم لي اتصل سبق ليهم حذروا الرقم ديالوا، وغادي يسولوا القاضي: “شريط الفيديو لي صورتيه مع المتهم واش حطيتيه في صفحة الإذاعة أم صفحتك الشخصية ؟، مومو قال للقاضي بأن الفيديو تحط في الصفحات بجوج والأولى هي صفحة الإذاعة.
مباشرة بعد الاستماع للمتهمين جا الدور ديال هيئة الدفاع لي ترافعات لأزيد من ثلاث ساعات، وبعدها هيئة المحكمة قامت برفع الملف للمداولة بتاريخ الثلاثاء التاسع من الشهر الجاري.
