اكسبريس تيفي
يبدوا أن محمد زيان ما ناويش يحرم المغاربة من “الحلقة” كأحد فنون الفرجة اللي كيتقنها، وناوي يكمل مشوار سلسلته من داخل سجن “العرجات”، اللي كيقضي فيه عقوبة ثلاث سنوات سجنا، وفي اخر النكت اللي مسجلة باسم النقيب السابق، هي أن التقويم الهجري هو التقويم الرسمي للمملكة المغربية، على اعتبار أن الدستور في فصله الثالث يعتبر أن الإسلام هو دين المملكة.
أكيد أن المواطن المغربي بمجرد سماعه لهذه النكتة غادي يضحك، وهنا كتبان قوة الحس الفكاهي للنقيب السابق، لأن المغاربة ما محتاجينش تكوين قانوني باش يعرفوا أن التقويم الرسمي للمملكة هو الميلادي، والدليل هو “المانضة” كتكون في اخر الشهر الميلادي، وحتى تواريخ المناسبات الرسمية للمملكة كلها كتكون بالتواريخ الميلادية اللي كتوافق مع التاريخ المعتمد في جل بلدان العالم.
زيان اسيادنا بهذ النكتة حاول يبرر قضاءه لنصف العقوبة الحبسية، باش يتقدم بطلب الافراج المقيد بشروط، ولقى التخريجة في استعمال التقويم الهجري.
هذا الإجراء من اختصاص وزير العدل، ومن خلاله كيقدر يتم إطلاق سراح السجين نظرا لحسن سيرته على أن يبقى مستقيم السيرة في المستقبل، والكل يعرف أن محمد زيان كان مثالا للاعوجاج قبل وقيد تواجده في السجن.
لكن السؤال المحير هو علاش زيان ما تقدمش بطلب العفو الملكي، وتقدم بهذ الطلب اللي معروف أنه ممكن يتأخر لمدة تقدر توصل لسنة.
وزير العدل السابق، واللي كيرفض يعترف بجميع التهم المدان من أجلها، وكيحاول يسوق عبر منابره والمنابر ديال الناس اللي خدامين به أنه معتقل رأي، وبطبيعة الحال ما هذا إلا استمرار لمحاولاته المكشوفة والمفضوحة والمتواصلة للإساءة لمؤسسات وأجهزة الدولة، والاختيار ديال مسطرة طلب الافراج المقيد بشروط، زيان كيعتقد أنه غادي يقوم بلي ذراع القضاء المغربي بمحاولات الضغط على وزارة العدل عبر بعض المنظمات ذات البعد الدولي، واللي معروفة لمحاولات تدخلها في سيادة الدول عبر جهاز القضاء تحت دريعة حقوق الانسان.
