إكسبريس تيفي/نجيبة جلال:
سير عند لمخاشفة شكوناهوما لمخاشفة؟ لي يبعو الراس مع الكرشة هو يعبر وانت عزل ليعملك منخار لعجل تبقا فالطجين تدور وتصبحنا بلا فطور آو حضي راسك ليفوزو بيك القومان يا فلان”
خوتي المغاربة ، لعب المخاشفة لي غنى عليهم الحسين السلاوي الله يرحمو هو لي كيديروه لينا اليوم مرتزقة اليوتوب و الفايسبوك، رباعة ديال الشلاهبية كيضربو خبط عشواء و جارين معاهم سرسوب ديال المغاربة و فكل كارثة كيقولوها كتبحث شوية كتلقاها كلها تشلهيب و كذوب و تنوعير!!!!
مالين البلاد خدامين و شادين الطريق و عوض ما يخليو المواطنين يواكبو هاذ السرعة كيخلقوا لينا أفلام و كيكذبو و يتبقوا راسهم ….
اش منك يا العالم لي مقتنع و مخرج عينيه و كيقول ان القرآن نزل على قريش و كيتهجى فآية قرانية ما عرفش حتى ينطقها و خدام باغي يجتهد فيها ….و هو خدام على حاجة واحدة …التنوعير لعل و عسى ينوض الصداع فهاذ الارض السعيدة
واش منك يا مؤرخ #الملاكات و العقارات من فلوس جمعية لي خارج يتهم الدولة انها باغية تجيد الصداع بين اليساريين و الإسلاميين ، و يقارن المغرب بالسينيكال..و قالك حاكموا شي واحد بحال لي المغرب كيحاكم مناضلين …و نسى ما ذكرش ان الرئيس لي خارج راه جاي يستقر في المغرب و هذا لي طلع براسو مني يسالي ولايتو الرئاسية الاولى و الثانية غادي حتى هو يحب يستقر في المغرب و هذا هو الفرق بين الملكية المغربية و الجمهورية لي كيحلم بيها المعيطي و رباعتو …و هادشي لي كيارخوه المؤرخين ماشي تجمع التيترات على ظهر المغاربة و تسمي راسك مؤرخ
واش منك يا مفكر و يا مفني في السياسات العمومية و الحقوق لي معذب ولدو و طليقتو و مخليها تجري فالمحاكم باش تصاوب لولدو بطاقة التعريف الوطنية و ااباسبور..واش لي واحل فشغل دارو غادي يفتي في تدبير البلاد ..
واش منك يا خلود ..الله يخليها قاعدة ولفتيها ..الحياة بليكي و ما حد الراجل في الحبس و انتي مدورة الحركة و مني فضحناك خرجتي عريني على اللاص و باغية تعاطاي و انت ما قدرتيش ديري بحال اللخرة في لالياتك المغربيات الحرات و تخرجي تخدمي على راسك ..و ها سليمان عيى و عرى المكشوف و هرس تيليفون غيير باش ما تبقايش تعيطي عليه و قالك قلبي عليه …
عصابة البراحة و الابواق الصدئة الي عايشة فسرق الدلالة الحقوقي يتم استخدامها حسب الظروف وهم معروفين بنضالات فيها غير حقوقهم هوما !! واش المناضل كيكذب؟ واش الحقوقي كيسب ؟
وا المغاربة …هذا هو لعب المخاشفة!!! الشلاهبيةً كثروا و كلشي ولا باغي يركب على الموجة ….حتى من مومو ..صحفي في راديو باغي البوز …سيناريو ديال شفرة على الأثير …كذبة هدفها رفع عدد المتابعين و تعطي فيها لواحد معيط ليك أيفون .و تبان انت هو البطل ….وعلى حساب من ؟؟ واش زعما ما عيقوش هاذ صانعي السيناريوهات باش يطلعو العدد ديال المتابعين و يضمنوا اكبر رصيد من الدعم العمومي؟؟؟ واش هاذو هوما المقاولات الكبيرة الي كيتكلمو عليها القاىمين علىً امور النشر و الصحافة فالبلاد؟
هادشي علاش كنقول زمان المخاشفة لي باغين يبردعو المغاربة و يبيعوهم العجل …بقصص كلها كذوب و ملبسينها لباس الحقوق او الدراما….و في النهاية لي كيدفع الثمن هي البلاد و المواطن ..و المصيبة ما بقاتش غير عند مدونين و يوتيوبرز ..المخاشفة دخلوا حتى للصحافة
ولكن ..لي غناه حسين السلاوي غناه زمان ..و اليوم لي حصل يودي ..الامن الوطني ما عطلوش مومو هو و كومبارسات المسرحية البئيسة و قدموهم لعند الوكيل
بقاو لينا مرتزقة الحقوق لي خاصهم يوقفوا عند حدهم المعيطي و خلود و خالد و مول القران لي نزل على قريش ..هاذو خاص المتابعين يفيقوا و يفهموا ان هاذ الناس هوما العشور ديال البلاد ..ويلا بغينا طريقنا تسلك معاهم خاص نحطوهم فبلاصتهم و باراكا ما تيقوا تيقوا هاذ الشلاهبية …
زمان المخاشفة سالا و القانون ما غاديش يبقى يتساهل لان كذبة يوتوب و الفايسبوك هي لي خلقت مناخ سوداوي عند المواطنين و عوض ما نستمتعوا بالأشياء الإيجابية لي كتدار فبلادنا هاذ المرتزقة متأففين و منظمين راسهم فخلية منظمة هدفها خلق الكذوب و التهم باش المغربي ما يبقى يثيق فوالو! و المصيبة ولاو يعاونوهم حتى الصحافيين!!!
زمان المخاشفة سالا و الكذابة و المدلسين فاينما كانوا خاصهم يتفضحو و يتعاقبو ….…الفيسبوك ماشي دمية للعب، التدوين أو التعليق عل مواقع التواصل الاجتماعي مسؤولية لا تقبل التهور و الصحفي مسؤوليتوً كبر من المدون … ولي وصلنا ليه اليومً هي ان الجدية لي تكلمً عليها سيدنا خاصها طبق فكلشي …
عند المواطن : لي مني يشوف تدوينة ديال المخاشفة خاصو يسينياليها!!!
عند الصحفي : لي خاصو مني يشوف لعب المخاشفة يفضحوا و في جميع الاحوال ما يديرون هو باش يتبوطل!!!
و عند المسؤولين على دعم المقاولات الصحفية لي خاصهم يحبسوا الدعم على المواقع و الجرائد لي كتلغب لعب المخاشفة …
المخاشفة ما كيتحاربوش بالكلام و صافي ..خاص لي عندو شي مسوولية يكون جدي فيها وًما يبقاش يطعم و يغذي ممارسات كدكدك فالبلاد!
الفيديو على الرابط التالي :
